Akoang Labing Unang Balak
Tiguwang na gayud sila…
sila Mama ug Papa
nga sukad sa akong pagka-bata,
mao nay nag-amuma.
nagkaligo,nagpakaon ug kanako nagpa-eskwela
Kahinumdom ko sauna
nga kami sa akong mga igsuon bata pa,
ila gyud ming isuroy sa bisan asa
matag Dominggo ighuman simba
Kuyugon ko ni Papa kon naay kalingawan sa ilang trabahoan
Kuyugon sab ko ni Mama kon mag-aerobics sila sa akong ninang
Aduna say panahon nga ako makasab-an
kay mogawas man gyud ning akong bati nga batasan.
kon gani makahinayak na ko pagpamakak,
di na sila mailad kay kaila na sila sa ilang anak.
bisan pa niining tanan kanunay silang naa sa akong tupad ug nagsuporta
sa akong first holy communion hangtod sa high school graduation,
way puas gayud ang ilang gihatag nga atensyon.
bisan pa man sa akong kamaldita ug pagka-ritubada,
wa gihapon sila pul-i og pagdisiplina
ila hinuon gihatag sa akoa,
ang way hunong nga pagpangga.
Pasayloa ako sa tanang dautan nga nahimo nako---
sa akong gihatag nga perwisyo,
sa akong pagkiat sa balay kon wala mo,
ug sa akong gipangayo nga mahal og presyo.
Salamat sa maayong pagpadako kanako,
sa suhol kon motuman sa sugo,
sa pag-andam og pagkaon kon adlawng’ natawhan nako,
labi na gyud sa pagtugot nga maka-uyab ko.
Karon nga naa na ko sa kolehiyo
bisan pa man og layo ko ninyo,
akong gipanumpa nga sa pagtungha ako magtinarong
kay sakit gyud sa dughan kon naay hagbong
Bitaw Ma ug Pa,
magtinarong gyud ko sa pag-eskwela
kay moabot ra unya ang panahon
nga makab-ot ko ang akong mga ambisyon
Mabaslan ko na kamo sa tanan ninyong kaayo,
ipasalig ko nga di mausik inyong mga sakripisyo.
by:
Jessila Garciano Lauron
